ILOILO – Ginahanda na sang Mina Municipal Police Station (MPS) ang kaso nga ipasaka batok sa duha ka lalaki nga ginapahayag naghimulos sa isa ka dalagita sa Mina, Iloilo.
Ang biktima ang naga-edad 12 anyos, residente sang Zarraga, Iloilo; samtang ang mga suspek ang nagaedad 18 anyos kag 19 anyos, residente sang banwa sang Mina kag New Lucena.
Sa interview sang Bombo Radyo kay Pol. Lt. Gina Fernandez, officer in charge sang Mina MPS, iya ginpahayag nga Enero 16 sang nagpadulong ang biktima sa Mina bangud nahagaran ini nga magtambong sa birthday party sang pakaisa sang isa sa mga suspek.
Sa amo nga party, nahubog ang biktima; kag bangud wala na sang masakyan pauli, nahagaran ini nga magtulog sa balay sang isa sa mga suspek sa amo nga banwa.
Suno kay Fernandez, posible nga nagsalig man ang biktima bangud chat mates niya ang duha ka lalaki, gani bisan wala na sang iban nga tawo sa amo nga balay, nagpasugot ang dalagita nga magpalipas sang gab-i upod ang duha ka suspek.
Didto kag natabo ang pagpanghimulos nga ginsugid man sang dalagita sang nakaabot na siya sa ila balay sa Zarraga pagkaaga.
Ginapahayag nga Lola lang sang biktima ang iya kaupod bangud sa luwas sang pungsod ang iya ginikanan.
Ginpaidalom sa medical test ang biktima kag positibo ang resulta nga ginhimuslan siya; samtang, todo-panginwala naman ang mga suspek nga nahimo nila ang pagpanghimulos.
Handa nga magpasaka sang kaso ang pamilya sang biktima.
