Gin-anunsyo sang defense ministry sang Taiwan nga nagdangat sa 12 ka Chinese warships kag 91 ka aircraft ang nakit-an sa palibot sang isla sa katapusan nga adlaw sang military exercises sang China sa dagat nga nagapalibot sa Taiwan.
Suno sa defense ministry, apisar nagpahayag na ang Eastern Theatre Command sang China nga nagtakop na ang ila nga exercises, wala nagakumpyansa ang Taipei.
Ginkondenar man sang foreign ministry sang Taiwan ang China bangud sa amo nga drill nga ginpahayag nagaguba sa kalinong sa rehiyon.
Sa bahin sang China, gin-deklarar sini nga madinalag-on ang ila tatlo ka adlaw nga war games.
Ang amo nga exercises amo ang sabat sang Beijing sa pagkit-anay nanday Taiwan President Tsai Ing Wen kag US House Speaker Kevin McCarthy sa California sa nagligad nga semana.
Nagpaandam naman ang Eastern Theater Command nga handa ang militar sang China sa anuman nga oras agud nga papason ang anuman nga sahi sang “Taiwan independence” kag kun manghilabot ang iban nga mga pungsod.
