Ginkumpirma sang Bureau of Customs (Customs) nga na-secure nila ang 12 ka luxury cars sang pamilya Discaya nga sakop sang nakabutang sa search warrant nga gin-isyu sang korte.
Kahapon sang aga, Septyembre 2, una nga gin-anunsyo sang Customs nga duha lang ang ila nga nakit-an nga salakyan sa headquarters sang St. Gerrard Construction General Contractor and Development Corp. sa Pasig City.
Kagab-i, gin-surrender sa ila ang pito ka iban pa. Iga-surrender man sa ahensya ang tatlo ka iban pa nga subong yara pa sa authorized centers para sa repair.
Yari ang mga salakyan nga ginselyuhan na kag ginguwardyahan sang mga personnel sang BOC kag Philippine Coast Guard:
- Toyota LC300 3.3 V6 ZX AT SUV 2024
- Maserati Levante Modena 2022
- Rolls Royce Cullinan 2023
- Bentley Bentayga
- Mercedes Benz G-Class (Brabus G-Wagon)
- Mercedes AMG G 63 SUV 2022
- Toyota Tundra 2022
- Toyota Sequoia
- Cadillac Escalade ESV 2021
- Mercedes Benz G 500 SUV 2019
- GMC Yukon Denali SUV 2022 (Gas)
- Lincoln Navigator L 2024
Sa Senado naman, ginbulgar ni Senate Pro Tempore Jinggoy Estrada nga lab-ot sa 80 ka mga salakyan ang ginapanag-iyahan sang mga Discaya sandig sa iya natipon nga impormasyon. Sa sini nga numero, 63 lang suno sa iya ang rehistrado sa Land Transportation Office (LTO).
Sa isa ka interview kay Sarah Discaya antes ang hearings sa Kongreso, ginsiling sini nga may 40 sila ka luxury cars. Sang ginpatawag na siya sa Senado, nagpahayag ini nga may 28 lang sila ka luxury cars apang may service cars nga nakapangalan sa kumpaniya.#
