Tungod sa padayon nga pagbaha, nagpasar sang resolusyon ang 12 ka mga kapitan agud ipanawagan ang rehabilitasyon sang Budburan Creek sa Lapuz, Iloilo City.
Sa interview sang Bombo Radyo kay Punong Barangay Elfren Cenayo sang Brgy. Don Esteban Lapuz, ginpahayag niya nga 12 ka barangay kapitan ang nagpasar kag nagpirma sang resolusyon nga ginpadala sa mga ahensya sang gobyerno para tutukan ang problema sa baha nga dala sang Budburan Creek.
Suno sa iya, bisan madamo sang drainage system, wala sang epektibo nga outlet ukon gwaan ang tubig.
Ginpadal-an na nila sang sulat ang City Government, ang congressman, kag iban pa nga ahensya.
Kag suno sa iya, sang una, may ginpatuman nga relocation sang mga residente sa palibot sang creek, apang subong, may mga bodega na nga nagtindog sa lugar, kabangdanan nga mas nagnubo ang kapasidad sang tubig nga mag-agi.
Ginpahayag ni Kapitan Cenayo nga daw “patay na gid ang Budburan Creek” kag ginapangayo nila ang solusyon antes pa maglala ang epekto sang pagbaha sa ilang mga barangay.
