ILOILO CITY – 11 ka Locally Stranded Individual kag 1 ka repatriated Overseas Filipino Workers ang nagdugang sa 228 nga kumpirmado nga kaso sang Coronavirus Disease 2019 (COVID-19) sa Western Visayas.
As of June 25, naglab-ot na sa 240 ang COVID-19 cases sa Rehiyon, nagsaka naman sa 123 ang naka recover kag 11 sa gihapon ang patay.
Sa 988 ka laboratory results nga ginpaguwa, ang mga nagpositibo amo sanday:
Patient no. 229 – 30 anyos nga babayi sang Tubungan, Iloilo
Patient no. 230 – 23 anyos nga lalaki sang Escalante City, Negros Occidental
Patient no. 231 – 29 anyos nga babayi sang Victorias City Negros Occidental
Patient no. 232 – 24 anyos nga babayi sang San Enrique, Negros Occidental
Patient no. 233 – 48 anyos nga lalaki sang Hinigaran, Negros Occidental
Patient no. 234 – 21 anyos nga babayi sang Himamaylan,Negros Occidental
Patient no. 235 – 27 anyos nga lalaki sang Cadiz City, Negros Occidental
Patient no. 236 – 52 anyos nga babayo sang Victorias City Negros Occidental
Patient no. 237 – 29 anyos nga babayi sang Bacolod City
Patient no. 238 – 42 anyos nga lalaki sang Pototan, Iloilo
Patient no. 239 – 25 anyos nga babayi sang Hinobaan, Negros Occidental
Patient no.240 – 26 anyos nga babayi sang Cadiz City Negros Occidental
Ang 12 ka pasyente ang lunsay naka facility quarantine apang si Patient no. 238 gid lamang ang repatriated Overseas Filipino Worker.
Ang duha ka mga naka recover naman amo sanday:
Patient no. 127 – 31 anyos nga lalaki sang Cadiz City, Negros Occidental kag repatriated Overseas Filipino Worker
Patient no. 132 – 29 anyos nga lalaki sang Silay City, Negros Occidental kag Locally Stranded Individual
Kun pahat-pahaton, 6 ang COVID-19 case sa Aklan, 14 sa Antique, 6 sa Capiz, 23 sa Iloilo Province, 3 sa Negros Occidental, 11 sa Bacolod City, 20 sa Iloilo City kag 157 naman sa mga repatriates.
Sa bahin naman ni Mayor Roquito Tacsagon sang Tubungan, iya gindula ang kahangawa tuhoy sa pagpositibo ni Patient no. 229 nga isa ka Locally Stranded Individual halin sa Cebu.
Suno kay Tacsagon, nagpadulong sa Cebu ang 30 anyos nga babayi para sa training may kaangtanan sa trabaho kag naabutan sang lockdown.
Ginpahayag ni Tacsagon nga nga nag-abot sa Iloilo ang nasambit nga pasyente sang Hunyo 17, gilayon nga gindala sa facility quarantine kag sang Hunyo 18 na ginkuhaan sang swab sample.
Sa subong, nagapabilin nga asymptomatic ang nasambit nga pasyente.
Sa bahin naman ni Mayor Adi Lazaro sang Pototan, iya ginpahayag nga wala nakapauli sa banwa si Patient no. 238 nga isa ka repatriated Overseas Filipino Worker.
Suno kay Lazaro, isa ka electrician sa Saudi Arabia ang nasambit nga pasyente ang na-isolate na nga daan samtang sakay sa barko kag sa subong, nagatinir sa sa facility quarantine sang syudad sang Iloilo.
