ILOILO CITY – 12 ka mga resto bars sa distrito sang Mandurriao ang gin-isyuhan sang Iloilo City Government sang citation tickets bangud sa pag-operate apisar wala sang business permits.
Sa interview sang Bombo Radyo kay Nestor Canong, pinuno sang Task Force on Morals and Values Formation, iya ginpahayag nga magluwas nga wala sang permit, nagaserbe pa sang makahulubog nga ilimnon ang nasambit nga mga resto bars.
Ini suno kay Canong ang paglapas sa Executive Order No.140 ni Iloilo City Mayor Jerry Treñas nga ‘absolutely prohibited’ ang mga beerhouses kag similar establishments nga may tinutuyo nga magserbe sang makahulubog nga ilimon.
Pahanumdom sang natungdan, tubtob 6:00 sa kasisidmon lang ang mahimo baligyaanay sang liquor sa syudad nga subong nakapaidalom pa sa modified general community quarantine (MGCQ) status apang indi mahimo mag-inom sa pampubliko nga lugar.
Suno kay Canong, nahangpan sang gobyerno nga mapin-ot ang sitwasyon sang mga negosyante subong nga may COVID-19 pandemic apang kinahanglan sa gihapon nga magkuha sang permit sa Business Permits and Licensing Office (BPLO) agud makabalik man sa syudad ang buwis kag mapasanyog ang ekonomiya. #
