ILOILO CITY – Daku nga pagpanghangkat para sa Education sector ang pagpatigayon sang de-kalidad nga pagtudlo sa mga estudyante sa subong nga may COVID-19 pandemic.
Ini ang rason kun nga-a ang pamunu-an sang West Visayas State University ang nagdesisyon nga magpangita sang alternatibo nga platform sa pagtudlo kag isa na diri amo ang pagpanghatag sang tablet sa mga estudyante para sa online learning.
Sa interview sang Bombo Radyo kay Dr. Joselito Villaruz, President sang West Visayas State University, iya ginpahayag nga nag-abot na ang una nga batch sang gadgets nga ginabug-usan sang 1,200 units sang tablet.
Suno kay Villaruz, nag-agi sa legal procurement process ang pagbakal sini kag sa subong, ginatutukan ang pag-upload sang modules agud nga maumpisahan na ang pag-deliver sang gadgets sa tagsa ka estudyante.
Ginpahayag ni Villaruz nga may yara man sang printed modules nga igahatag sa mga estudyante kag bangud nga ang health kag safety sang tanan ang prayoridad sa subong, ginapangitaan sang paagi kun ano ang mga modality nga makapaayo.
Indi mahinago suno sa natungdan nga wala nahandaan sang tanan ang COVID-19 pandemic kag indi malikawan nga may yara sang kakulangan sa pagpatigayon sang online classes apang sa dalayon, ini ang mapangitaan gid sang solusyon sang gobyerno.
Bangud nga nag-umpisa na ang klase, daku nga pagpanghangkat suno sa WVSU President ang pagpatigayon sang lecture ilabi na kun ang subject ang nagakinahanglan sang face to face interaction apang ang remedyo diri amo nga ang mga subject kasubong sang laboratory kag practical ang ginhalin sa masunod nga semester.
