STA. BARBARA, ILOILO – Pinasahi kag labing una nga kahigayunan nga ginselebrar sang simple ang Independence Day sa diin gamay lang ang tawo nga nagtambong.
Ginpangunahan nanday Iloilo Gov. Arthur Defensor Jr. kag Police Regional Office (PRO-6) Director Police Brigadier Gen. Rene Pamuspusan ang flag raising kag wreath laying sa Sta. Barbara, Iloilo.
Sa interview sang Bombo Radyo kay Gov. Defensor, iya ginpahayag nga bangud gina-eksperyensyahan ang Coronavirus Disease 2019 (COVID-19) pandemic, ang selebrasyon ang gin-updan sang pag-obserba sang physical distancing kag pagsuksok sang face mask.
Suno kay Defensor, ang adlaw sang kahilwayan ang isa ka pamaagi agud ma-remind liwat ang mga tawo nga ang nangin rason sang kadalag-an sang mga baganihan nga nakuha sang Pilipinas ang kahilwayan amo ang pag-isa sang mga Filipino.
Gani subong nga may pandemya, agud nga mangin madinalag-on sa pagpakig-away batuk sa nasambit nga balati-an, kinahanglan pahayag ni Gov. Defensor nga mag-hugpong kag mag-ugyon ang tanan.
Nahibaluan nga sa Sta. Barbara makita ang ang pinakadaku nga hayahay sang Pilipinas kag ginakabig nga Cradle of the Philippine Revolution outside Luzon.
Samtang suno naman kay Sangguniang Bayan Member Dennis Octaviano sang Sta. Barbara, Iloilo, magluwas sa mga baganihan nga nakig-away agud makuha ang kahilwayan sang Pilipinas, hatagan man sang pasidungog ang mga frontliners subong nga may ginapatubang nga pandemya.
Apisar sa simple kag gamay nga tawo nga nagtambong sa selebrasyon, malipayon sa gihapon si Octaviano bangud natigayon nga ma komemorar kag wala ginpabay-an ang makasaysayan nga adlaw.
Mensahe naman ni PBGen. Pamuspusan sa publiko nga magbuligay agud mapakigbato-an ang COVID-19.
Kinahanglan lamang ang disiplina sa isa kag isa agud mangin mas maayo nga tawo sa tunga sang pandemya.
Nagpasalig naman si Pamuspusan nga ila padayon nga tungdan ang ila obligasyon sa mga pumuluyo kag buligan ang mga local government unit amo man ang komunidad agud mapabilin ang kahilwayan sang Pilipinas.
