Gin-report sang Committee to Protect Journalists nga ang 2024 amo ang pinakamakamamatay nga tuig para sa journalists sa recent history sang kalibutan.
Gintudlo man sini ang Israel nga amo ang responsable sa kamatayon sang halos 70% sang 124 ka mga reporters nga napatay sang amo nga tuig.
Ang total killings sang 2024 sa 18 ka mga pungsod ang mas mataas sang 22% ipaanggid sa 2023 kag gina-angot sa pag-ibwal sang international conflict, gamo sa pulitika, kag kriminalidad sa bilog nga kalibutan.
Suno sa report, 85 ka reporters kag media workers ang napatay bangud sa gyera sang Israel kag Hamas kag tanan ang lunsay ginbawian sang kabuhi sa kamot sang Israeli military.
Sa 85 nga ini, 82 ang Palestinians.
Ginasundan ini sang Sudan kag Pakistan nga may tag-anum nga napatay; Mexico nga may lima; Haiti nga may duha; kag ginasundan sang Myanmar, Mozambique, India kag Iraq.
“Today is the most dangerous time to be a journalist in CPJ’s history,” suno sa CEO sang grupo nga si Jodie Ginsberg. “The war in Gaza is unprecedented in its impact on journalists and demonstrates a major deterioration in global norms on protecting journalists.”
Nahibaluan nga nag-umpisa ang CPJ sa pag-rekord sang journalists nga nagakapatay halin sang 1992.
