Patay ang 13-anyos nga bata nga lalaki matapos malumos sa Malagumpit Falls sa Barangay Cahigon, Calinog, Iloilo kadungan sang Biyernes Santo.
Sa interview sang Bombo Radyo kay Mr. Rodolfo Valencia, head sang Municipal Disaster Risk Reduction Management Office (MDRRMO) sang Calinog, iya ginpahayag nga may okasyon nga ginhiwat sila kaupod ang iya tiyo kag iban pa nga myembro sa pamilya rason nga nagpaligo kag naglangoy sila sa amo nga busay apang samtang nagalangoy ini sila natalupangdan nila nga wala na makabutwa ang amo nga 13-anyos.
Gilayon man nga gin-radyohan nila ang punong barangay kag ang taga MDRRMO agud magpangayo sang bulig.
Suno kay Valencia, nadugayan pa ini nga marespondehan bangud malayo ang amo nga falls sa banwa nga may ginabulubanta 13-kilometros ang distansya. Magluwas diri, suludlon ang falls kag layo sa karsada.
Ginhingagaw pa ini dala sa hospital apang ginbawian man gilayon sang kabuhi.
(Article: Bombo Hanna Andasa), (Photo: Smit Chua)
