Patay ang 13 anyos nga dalagita kag missing naman ang 12-anyos nga kaupod sini matapos nalunod sa baybay sa Barangay Pacencia, Tobias Fornier, Antique.
Ang napatay amo si Princess Anne Egualan, samtang ang padayon naman nga ginapangita amo si Jan Nazaren Baguna, lunsay residente sang Barangay Abaca, Tobias Fornier.
Sa interview sang Bombo Radyo kay Police Staff Sergeant Rene Basilio, imbestigador sang Tobias Fornier Municipal Police Station, iya ginpahayag nga apat ka mga bata ang nagpadulong sa baybayon kaina sang aga agud magpaligo.
Ginapahayag wala natalupangdan sang mga bata nga nagdalagku na ang balod bangud malain ang tyempo.
Sang ulihi, gin-anod gid sang balod ang duha sa ila, samtang nakatakas naman ang duha kag nagpangayo sang tabang.
Ginhingagaw pa dala sa ospital ang dalagita apang gindeklarar nga dead-on-arrival.
Padayon naman ang retrieval operation para sa isa pa ka biktima.
