POTOTAN, ILOILO – Patal nga pilas sa ulo ang gintunaan sang kamatayon sang 13 anyos nga estudyante nga nabunggu-an sang van sa Brgy. Cahaguichican, Pototan, Iloilo.
Sa interview sang Bombo Radyo kay Police Staff Sergeant Raffy Gonzales, imbestigador sang Pototan Municipal Police Station, iya ginpahayag nga ang biktima ang ginkilala nga si alyas Nene kag high school student sa syudad sang Iloilo.
Suno kay Gonzales, nagapapauli na sa Brgy. Agmanaphao Mina, Iloilo ang biktima sang natabo ang aksidente.
Ginpahayag ni Gonzales nga hinali nga nagtabok sa dalan ang biktima matapos nga nakapanaog sa Ceres Bus kag mahimo nga wala niya natalupangdan nga nagapadulong ang van nga ginamaneho ni Adonis David Benedicto Falarco, 45, sang Zone 6, Gonzaga St., Purok 4 Poblacion, Pavia, Iloilo.
Nakita pa mismo sang nagsugat nga tiyo ang natabo sa iya high school student nga hinablos.
Dead on Arrival sa hospital ang biktima bangud sa naangkon nga patal nga pilas sa ulo.
Sa subong, preso na sa Pototan Municipal Police Station kag nagpabutyag naman sang settlement ang pamilya sang biktima.
