ILOILO CITY- Patay ang 13-anyos nga solterito matapos nakuryente sang ginsuksok nga headset sa computer shop sa Barangay Devera, Sara, Iloilo.
Ang biktima amo si alyas “Jom” kag residente man sang nasambit nga lugar.
Sa interview sang Bombo Radyo kay PCpl. Paul Bryan Bantigue, imbestigador sang Sara Municipal Police Station, iya ginpahayag nga antes naggamit sang computer ang biktima, ginpaandaman ini sang tag-iya nga indi ini paggamiton bangud may damage ini.
Samtang ginasuksok ang headset, hinali lang nga nagkurog-kurog ini.
Gintuyo pa nga salbaron sang iya upod ang solterito apang nakuryente man ang iya abyan rason nga ginbuy-an niya ini.
Gindala pa sa ospital ang biktima apang gindeklarar nga dead on arrival.
Nagpasalig naman ang tag-iya sang computeran nga sabton niya ang gasto sa pagpalubong sa biktima.
