Patay ang 13 anyos nga solterito sang ginpahayag ginlampusan sa ulo gamit ang ball hammer sa sulod mismo sang ila balay sa Barangay Casalsagan, Pototan, Iloilo.
Nahibaluan nga ang biktima lang kag ang iya nga amay ang updanay nga nagapangabuhi.
Sa interview sang Bombo Radyo kay Mr. Raul Patchejo Sr., amay sang biktima, iya ginpahayag nga sang nag-abut ini sa ila balay, nasapwan na lang sini sa kusina ang iya bata nga nagakaya kag wala na sang kabuhi.
Gilayon niya nga ginhakwat ini kag gindala sa ospital apang gindeklara nga dead on arrival.
Sa panaysayon sang amay, nakita pa niya sa kilid sang iya bata ang isa ka ball hammer nga amo posible gingamit sang suspek sa paglampus sa biktima.
Nanotisyaran man sini nga may yara pa sang agi sang kuko sa liog sang iya bata nga amo tuga sang pagpangkuga.
Sa subong, ang ginalantaw nga motibo sang krimen amo ang pagpangawat.
Nagapadayon pa ang imbestigasyon sang mga otoridad.
