ILOILO – Nakahanda nga magbaton sang Non-COVID patients ang mga district hospital sa probinsya sang Iloilo agud nga masolusyunan ang mga naga-alalawas nga pasyente sa mga hospital sa syudad sang Iloilo.
Sa interview sang Bombo Radyo kay Iloilo Gov. Arthur Defensor Jr., iya ginpahayag nga 13 ang district hospital sa probinsya kag mahimo ini nga maka-akomodar sang mga COVID kag Non-COVID patients.
Suno kay Defensor, indi mahinago nga may yara sang kakulangan sa mga district hospital ilabi na sa equipment kag medical doctors apang kun matabo, mahimo man nga makapangayo sang bulig sa Department of Health.
Ang mga severe COVID patients suno kay Defensor ang pagadal-on na sa ginakabig nga tertiary hospital nga nagatanyag sang mas kumpleto nga serbisyo sa mga pasyente.
Ginpahayag ni Defensor nga ang mga iloy nga manugbata nga residente sang probinsya sang Iloilo ang ginapanugyanan nga magbata na lang sa tagsa ka mga birthing center sa banwa agud nga indi na makapadugang sa ka gutok sa mga hospital.
Isa man sa requirement sa pagbata suno sa Gobernador amo ang negatibo nga resuta sang RT-PCR test nga kun kaisa, nangin tunaan pa sang problema sa pagpa-admit sa hospital.
