Padayon pa nga ginatinguhaan sang Department of Foreign Affairs (DFA) agud makapangayo sang pardon kaangot sa kaso sang 13 ka nagabusong nga mga Pinay nga gin-preso sa Cambodia bangud sa gin-alegar iligal nga pag-akto bilang surrogate mothers.
Suno sa ahensya, isa ini ka whole-of-government approach kag naga-trabaho sila kaupod sa iban nga mga ahensya sang gobyerno agud nga makakuha sang pabor sa hari sang amo nga pungsod.
“In response to reports about the anticipated return of the 13 surrogate women from Cambodia, the DFA wishes to affirm that we continue to do all we can to make this possible. This is a whole-of-government approach and many agencies are involved in the effort,” suno sa DFA.
Nagapakig-angot man ang embahada sang Pilipinas sa Phnom Penh sa Cambodian authorities kaangot sa sini nga isyu.
Madumduman nga nalakip ang 13 ka mga Pinay sa 24 ka mga babaye nga nadakpan sang Cambodian police sa probinsya sang Kandal sa amo nga pungsod sang Septyembre.
Ginkasuhan sila sang attempted cross-border human trafficking suno sa statement sang Kandal court.
Ginsiling sang korte nga may mapag-on nga mga ebidensya nga ini nga 13 ka mga babaye ang may intension nga ibaligya ang mga lapsag nga isa ka akto sang human trafficking. Ginsentensyahan sila sang apat ka tuig nga pagkapreso sa amo nga Southeast Asian country.
Kaangot diri, nagapanindugan naman ang gobyerno sang Pilipinas nga ini nga mga Pinay nga involved sa surrogacy scheme ang lunsay lamang biktima sang trafficking.
Sa sini lang nga Disyembre, matandaan nga ang Bureau of Immigration (BI) ang madinalag-on nga nakapugong sa duha man ka mga Pinay nga magabiya kuntani sa pungsod matapos nadiskubrehan nga gin-recruit sila bilang “surrogate mothers” sa Georgia sa Europa.
Una na nga nagduso si Senator Risa Hontiveros sang imbestigasyon sa Senado kaangot sa sini nga ginaalegar nga surrogacy scheme.
