Napuhag ang mga estudyante sa 13 ka mga eskwelahan sa New Zealand matapos nakabaton sang bomb threats nga nag-resulta pa sa pag-lock down sa mga buluthuan kag pag-evacuate sa mga tawo.
Isa ka adlaw antes sini nga insidente, may yara man sang tawag nga nabaton ang apat ka mga buluthuan sa amo man nga pungsod kag nagpamahog nga may bomba sa ila eskwelahan.
Ginapatihan sang New Zealand Police nga kabahin ini sang overseas cyberattack kag wala sang aktwal nga pamahog sa seguridad sang mga tawo sa mga eskwelahan.
Nagapreparar ang pulis sa pagpakig-angot sa ila international partners.
Sa subong, wala pa sang report nga may yara gid man sang mga bomba sa mga target nga lugar.
Suno kay Assistant police commissioner Bruce O’Brien, nakit-an nga may pagka-pareho ini nga mga insidente sa natabo nga global “robo-hoaxes” sa New Zealand kag Australian schools sang 2016 kag 2017.
Sang amo nga tion, sa dalayon nga imbestigasyon sang pulis, natumod nga taga-Israel ang suspek. Sang 2018, ginpreso ang Israeli-American nga suspek bangud sa 2,000 ka hoax threats nga ginhimo sini sa North America, Britain, Australia, New Zealand, Norway kag Denmark.
