Nakapauli sa Pilipinas ang 13 ka mga Pilipino sa tunga sang nagapadayon nga tensyon bangud sa pagsalakay sang Russia sa Ukraine.
Nag-abut sa Ninoy Aquino International Airport Terminal 3 ang 13 ka mga Pinoy kagab-i.
Suno sa Department of Foreign Affairs (DFA), ang 13 ka mga Pilipino ang naghalin sa Warsaw Chopin airport via Emirates flight EK 2023.
Sila ang kabahin sang 40 ka mga evacuees nga naghalin sa Kyiv padulong sa Lviv nga personal nga ginsugat ni Foreign Affairs Secretary Teodoro Locsin Jr. sa border sang Poland.
Dugang pa sang ahensya, ang Philippine Embassy sa Warsaw amu ang nag-facilitate sang travel, flight documents, kag hotel sang 13 ka mga Pilipino.
Ang tanan nga gastos sa repatriation ang ginkuha sa Assistance-to-Nationals fund sang DFA.
Nahibaluan nga nauna na nga nakapauli sa Pilipinas ang anom ka mga Pilipino sang Pebrero 18.
