HONG KONG – Pilason ang masobra 10 ka mga pulis matapos nga ginsulod sang mga protesters ang Legislative Council (LegCo) building ukon government headquarters sa Hong Kong.
Sa interview sang Bombo Radyo kay Bombo International Correspondent Merly Bunda direkta sa Hong Kong, iya ginpahayag nga 13 ka mga pulis ang gilayon nga gindala sa ospital bangud may mga ginpanghaboy ang protesters sang liquid cleaner batuk sa otoridad sa Lun Wo Road, Tim Mei Avenue kag Harcourt Road malapitsa legislative kag administrative centre.
Naka-eksperyensya sang mabudlay nga pagginhawa ang mga pulis kag naapektuhan ang mga supat sang otoridad bangud sa liquid cleaner nga gingamit.
Wala pa mahibaluan kun ano sahi nga liquid cleaner ang ginbasya sa mga pulis.
Suno kay Bunda, naggamit sang metal cart kag bars ang mga protesters agud nga mabuka ang cryztal nga pader kag pwertahan sang LegCo.
May yara man sang mga nagahaboy sang itlog kag botelya sa mga pulis.
Dugang pa sang natungdan, 1,000 ka mga pulis ang yara sa lugar apang bangud nga madamo man sang mga protesters kag nagtuga na sang tensyon, natigayun nga ma ransak sang mga protesters ang establisimento.
Nahibaluan nga ginselebrar sang Hong Kong ang ika-22 nga anibersaryo sa paghand-over sang China sa nasambit nga rehiyon.
