Magapresentar sang 13 ka mga testigo ang House prosecution panel sa kabug-osan nga impeachment trial ni Vice President Sara Duterte sa idalom sang Article I ukon sa gina-alegar nga paggamit sini sa indi insakto sang P612.5 million nga confidential funds.
Ini ang ginkumpirmar mismo ni House Prosecutor Rep. Joel Chua.
Suno sa iya, may posibilidad nga indi man nila mapresentar ang tanan nga testigo kun insakto na ang nahatag nga impormasyon sang pila sa mga ini nga makabulig man sa pagpadasig ukon pagpalip-ot sang ila presentasyon.
Ginpakigbahin man niya nga sa Article IV sang articles of impeachment, 11 ka mga testigo ang ila ginpreparar, apang tatlo lang sa mga ini ang ila nga ginpakita bangud nakahatag na ang mga ini sang kinahanglanon nga mga sabat sa trial.
Pahayag ni Chua, luyag gid sang prosekusyon nga makahatag gilayon sang desisyon ang senate impeachment court sa mas madali nga tinion.
Nahibaluan nga kabahin sa mga magatestigo ang duha ka former Commission on Audit auditors kag isa man ka House of Representatives records custodian.
Ka-Bombo, padayun lang sa paglantaw kag pagpamati sa Bombo Radyo para sa mga latest updates nahanungod impeachment trial ni Vice President Sara Duterte. Magapadayun ang trial bwas nga Adlaw, Agosto 3.
