Arevalo, Iloilo City – Bugal para kay Punong Barangay Felix Octavio sang Barangay Sta. Cruz, Arevalo, Iloilo City ang mga hinimuan sini sa barangay matapos ang 12 ka tuig nga pagpangalagad antes magapanaog sa posisyon subong nga tuig.
Ini ang kadungan sang nagahilapit nga 2023 Barangay and Sangguniang Kabataan Elections sa Oktubre 30.
Sa interview sang Bombo Radyo kay Octavio, iya ginpahayag nga pila sa mga proyekto niya amo ang pagtukod sang barangay hall, pagpa-semento sang mga kalsada, pagtakod sang solar system kag closed-circuit television.
Suno kay Octavio, nangin bugal man sang iya liderato ang malakip sa listahan sang mga drug free barangays sa Iloilo City.
Samtang, ginpahayag sang natungdan nga wala ini sang iga-endorso nga kandidato nga magabulos sa iya bangud ginarespeto niya ang mangin desisyon sang mayoriya.
Nahibaluan nga nalakip man sa mga last termers subong nga tuig sa distrito sang Arevalo amo sanday Punong Barangay Cecilia Nava sang Calaparan kag Punong Barangay Allan Macazar nga amo ang incumbent president sang Association of Barangay Captains sa distrito sang Arevalo.
