Natukiban nga mga pugante sa China ang 13 sa Chinese nationals nga naaresto sang gin-raid sang otoridad ang ginaalegar nga Philippine Offshore Gaming Operator (POGO) scam hub sa Pasay City.
Ginpasa sang Presidential Anti-Organized Crime Commission (PAOCC) ang ila nga mga pangalan sa Chinese embassy kag ang embahada sa Manila ang nagkumpirma nga guilty sila sa pila ka mga krimen sa ila ginhalinan nga pungsod.
Suno kay PAOCC executive director Gilbert Cruz, nadiskubrehan ini sang ginkuhaan sila sang biometric kag didto na kag nagsunod-sunod na sa pagguwa ang ila matuod nga mga pangalan kag ang ila ginkaulamiran nga criminal activities.
Wanted sila sa cryptocurrency and investment scam kag nagagamit man sang ginadumilian nga messaging app agud nga mapatigayon ang ila nga negosyo.
Ang ginakabalak-an sang PAOCC suno kay Cruz amo kun ngaa nakasulod pa gihapon ini nga Chinese nationals bisan nga banned naman ang Pogo diri sa Pilipinas.
“Especially those with red notice or may blue notice or wanted ng Interpol, automatic pagpasok dito niyan nagre-red alert na agad eh. Since wala silang dokumento nung pumasok dito, malamang puwedeng nag-back door sila or they used other means to get in our country,” pahayag sang natungdan.
Nagapakig-angot man sila sa Bureau of Immigration para sa backtrack investigation.
Lakip man sa natukiban sang awtoridad amo nga pila sa foreign workers ang nakapalagyo anay sang gin-raid ang POGO hubs sa Bamban, Tarlac, kag sa Porac, Pampanga kag nagsaylo anay sa mas gamay nga POGO operations sa Pasay.
