Ginkumpirma sang Philippine Statistics Authority (PSA) nga wala sang records sa national registry ang masobra 1,300 ka mga indibidwal nga ginapahayag nagbaton sang disbursements halin sa P500-million nga confidential funds sang Office of the Vice President (OVP).
Sa beripikasyon sang ahensya, sa 1,992 ka mga pangalan nga gina-link sa confidential funds, 670 lamang ang may halos naga-match sa PSA records. 1,322 naman ang wala gid sang birth records.
Nagguwa man nga 1, 456 ka mga indibidwal ang wala sang record nga nakapakasal samtang 536 naman ang may possible matches.
Sang gin-check naman ang death records, yara lamang sa 399 ang potential nga nagasanto.
Ini nga findings ang nakasaad sa sulat halin kay National Statistician kag Civil Registrar General Undersecretary Claire Dennis Mapa nga ginpadala kay Manila 3rd District Rep. Joel Chua nga amo ang chairman sang House Committee on Good Government and Public Accountability.
Suno sa statement ni Chua, pamatuod lamang ini nga certification nga kun ini nga mga pangalan ang indi makit-an sa civil registry, buot silingon, wala sila naga-exist. Posible suno sa kongresista nga gin-himu-himo lang ang acknowledgement receipts para nga ma-justify ang paggasto sang confidential funds.
“This certification from the PSA leaves little doubt — if these names cannot be found in the civil registry, it strongly suggests they do not exist. The acknowledgment receipts may have been manufactured to justify the disbursement of confidential funds,” suno kay Chua.
“These findings raise a critical question: if the recipients don’t exist, where did the money go? This is not just a clerical error; this points to a deliberate effort to misuse public funds,” dugang sini.
Kun balikan, diri man nga House committee nabulgar ang pangalan nga “Mary Grace Piattos” nga masami nagatuhaw sa acknowledgement receipts sa OVP confidential funds.
Nag-anunsyo na ang Kamara sang P1-million nga padya para sa makahatag sang impormasyon kun sin-o si Mary Grace Piattos bangud wala man ini sa database sang PSA. Tubtub subong, wala pa sang may nakapamatuod nga naga-exist ini bilang tawo.
Nahibaluan nga una naman nga ginplastar sa Kamara nga sala ang mga petsa kag indi mabasahan kag wala napirmahan ang mga pangalan sa mga dokumento nga ginpasa sang OVP kag Department of Education nga ginpamunuan man anay ni VP Sara Duterte.#
