Gin-freeze sang Court of Appeals (CA) ang assets sang mga opisyal sang Department of Public Works and Highways (DPWH) kag mga kontraktor nga involved sa ma-anomaliya nga flood control projects.
Suno kay Anti-Money Laundering Council (AMLC) Executive Director Matthew David, ini nga freeze order nagasakop sang 135 bank accounts kag 27 insurance policies.
Wala sini ginhingadlan kun sanday sin-o ang tag-iya sang sini nga bank accounts.
Apang ginkumpirma ni DPWH Secretary Vince Dizon nga ini nga accounts ang ginapanag-iyahan sang mga ginpangkasuhan sang ahensya sa Ombudsman.
Kun amo sini ang basehan, buot silingon, nalakip diri sanday Sarah Discaya, Pacifico “Curlee” Discaya, kag Roma Angeline Rimando sang St. Timothy Construction, kag ang Wawao Builders general manager nga si Mark Allan Arevalo.
Sa bahin sang DPWH, nalakip sanday former assistant regional director Henry Alcantara, former district engineer Brice Hernandez, kag former assistant district engineer Jaypee Mendoza nga ginatudlo nga parte sang Bulacan Group of Contractors ukon “BGC Boys.”
Sa petisyon sang AMLC sa CA, ginsiling nga ini nga bank accounts ang posible nga gingamit sa pagkomiter sang graft kag kurapsyon.
Ini pa lang ang una nga batch sang freeze order requests kag posible nga madugangan pa samtang padayon pa ang imbestigasyon sa kurapsyon.#
