Patay ang 14-anyos nga solterito sa Austria matapos nga brutal nga ginbuno sang 23-anyos nga Syrian asylum seeker nga ginkilala sang mga otoridad nga si Ahmad G.
Suno sa report, natabo ang insidente mga alas 4 sang hapon, Pebrero 15, oras sang Austria, sa Villach, sa diin gingamit sang suspek ang daku nga kutsilyo sa pagpangbuno nga nagresulta sa kamatayon sang bata kag pagkapilas sang lima ka iban pa.
Nauntat ang kinagamo samtang ginaalegar nga ginbunggoan sang food delivery driver ang suspek nga sang ulihi ginkilala sang mga otoridad nga si Alaaeddin Alhalabi, 42 anyos kag isa ka Syrian.
Samtang, padayon naman ang imbestigasyon sang mga otoridad agud mahibaluan kun may kaupod si Ahmad G. kag kun may kaangtanan sa anuman nga Islamist activity ang nasambit nga pag-atake.
Base sa mga nakasaksi sa insidente, ginpahayag sang mga ini nga ila nabatian nga nagasinggit sang “Allahu Akbar” ang suspek samtang nagakadlaw kag nagabuno.
Nagtuga ini sang kabalaka sa mga awtoridad nahanungod sa posibilidad sang terorismo. Apang, wala pa makumpirmar sang mga otoridad kon bala ang pag-atake isa ka terorista nga buhat ukon kon bala si Ahmad G. may problema lamang sa panghunahuna.
Gin-review man sang mga otoridad ang iya application para sa asylum kag kun pila ka oras ang iya gintinir sa asylum center, apang indi pa maathag kun kilala sang mga otoridad ang suspek antes ang insidente.
