ILOILO CITY – Ginmandu ni Mayor Jerry Treñas ang pagpatuman sang 14-day temporary quarantine sa syudad sang Iloilo.
Sa exclusive interview sang Bombo Radyo kay Treñas, iya ginpahayag nga indi anay pagpahanugutan nga makadungka sa pantalan sa syudad sang Iloilo ang mga barko nga may sakay nga pasahero halin sa iban nga rehiyon.
Suno kay Treñas, ang temporary quarantine ang igapatuman sa Martes, Marso 17.
Gin-athag ni Treñas nga indi apektado sang temporary quarantine ang delivery sang cargos agud nga indi maapektuhan ang supply sang mga balaklon.
Magapadayon ang close coordination sang tagsa ka Local Government Unit sa isla sang Panay (Iloilo, Iloilo City, Aklan, Capiz, Antique kag Guimaras) may kaangtanan sa mga lihok nga ipatuman agud nga indi na maglapta ang Coronavirus Disease 2019 (COVID-19).
Kadungan sini, gin-athag sang alkalde nga ang mga pasahero nga halin sa iban nga lugar sa pungsod magluwas sa mga-Taga Panay, ang ginadumili-an nga makasulod sa syudad sang Iloilo.
May yara sang magabantay nga team gikan sa law enforcement units agud masiguro nga ginasunod ang temporary quarantine.
Nahibalu-an nga indi lamang sa syudad sang Iloilo ginaduso ang temporary quarantine kundi nauna na nga nagpahayag si Governor Rhodora Cadiao nga may 14-day border restrictions sa entrance kag exit sa naaminhan kag nabagatnan nga bahin sang Antique epektibo sa Martes man nga adlaw.
