ILOILO – Naglab-ot sa 14 ka indibidwal ang nangin direct contact sang empleyado sang Bids and Awards Committee sa Iloilo Provincial Capitol nga nagpositibo sa COVID-19.
Sa interview sang Bombo Radyo kay Provincial Administrator Atty. Suzette Mamon, iya ginpahayag nga ang 14 ka indibidwal ang naka-quarantine na sa subong.
Suno kay Mamon, ang mga ginakabig nga medium kag low risks ang ginpanugyanan nga magpaidalom sa strict home quarantine.
Ginpahayag ni Mamon nga naka-umpisa naman sa pagpatigayon sang disinfection kag ini ang tapuson sa labing madali nga tion apang lauman nga may yara sang adjustment sa trabaho sa Bids and Awards Committee ilabi na sa subong nga madamo ang ginalagas nga deadlines.
May kaangtanan naman sa mga Returning Overseas FIlipinos nga nagpauli sa Iloilo, ginpahayag sang natungdan nga ginapangitaan sang paagi ang pagpahamtang sang dugang nga quarantine facility.
Sa pagpaathag sang Provincial Administrator, full capacity naman ang mga hotel sa syudad sang Iloilo kag may nagasunod pa nga mga batch sang Returning Overseas Filipinos.
Padayon ang close coordination sang Iloilo Provincial Government sa nanari-sari nga ahensya sang gobyerno may kaangtanan sa repatriation.
