Ginsita sang Commission on Audit (COA) ang 14 ka mga opisyal sang Department of Justice (DOJ) bangud sa madamo nga biyahe sang nakaligad nga tuig kag naggasto sang dako nga balor sang kwarta.
Sa ginpaguwa nga 2018 audit report, natukiban sang COA nga ang mga opisyal nga ginhatagan sang travel allowance ang napaslawan nga magpakita sang nagakaigo nga dokumento sa ila nga gingasto.
Ginkwestyon man sang ahensya ang mga opisyal nga nagatambong sa mga events kag pagsinapol sa iban nga pungsod.
Magluwas sini, natukiban man sang COA nga ginbakal sang DOJ ang ticket sa isa lang ka travel agency kag naggasto sang P1 million nga wala sang kasugtanan sa tunga sini kag sang Procurement Service-Department-Budget Management Government Fares Agreement.
Nahibaluan nga ginabanta masobra P700,000 ang naggasto nga indi suportado sang resibo kag iban pa nga dokumento para sa liquidation.
