Patay ang 14 ka mga tawo kag nasamaran ang 450 ka iban pa bangud sa pagsigabong sang mga walkie-talkie sa Lebanon.
Ini nga hand-held radios ang ginagamit sang Lebanese armed group nga Hezbollah.
Isa sa pagsigabong ang natabo malapit mismo sa haya sang mga napatay sa separado man nga pagsigabong sang pagers sang nagligad nga adlaw nga ginapasibangod man sang militante sa Israel.
Base sa pictures sang naglupok nga walkie-talkies, may nakabutang nga inside panel nga may label nga “ICOM” kag “made in Japan.” Base sa ila website, ang ICOM isa ka Japan-based radio communications kag telephone company.
Nahibaluan man nga ini nga mga radyo ang ginbakal sang Hezbollah lima ka bulan na ang nagligad kadungan man sang ila pagbakal sang pagers.
Antes ang pagsigabong sang walkie-talkies, 12 na ang napatay kag malapit 3,000 ang nasamaran sa separado nga pagsigabong sang pagers nga ginagamit man sang Hezbollah.
Nagpaandam ang grupo nga magatimalos sila sa Israel apang wala pa sang komento nga ginpaguwa ang Israeli Army apisar sang reports nga ginbutangan gid man sang ila mga operatiba sang substance sang explosives ang imported nga pagers.
Kaangot diri, magasapol na ang United Nations Security Council buwas kasunod sang request sang Algeria (on behalf sang Arab nations).
Nahibaluan nga may engkwentro na ang Hezbollah kag Israel halin pa man sang nagsugod ang gyera sa Gaza sang Oktubre 2023.
Ini nga mga away ang ginakahangaw-an nga magalapta pa gid sa Middle East nga posible magdalahig na pati sa Iran nga naga-suporta sa Hezbollah kag Estados Unidos sang Amerika nga kaalyado naman sang Israel.
Pananglitan may matabo nga full-blown war, ginakahangaw-an man ang mangin sitwasyon sang Lebanon bangud wala pa ini nakabangon sa mga krisis nga natabo sa sulod sang pila ka tuig lakip na ang 2019 financial collapse kag ang pagsigabong sa pantalan sa Beirut sang 2020.
