Nagsaka na sa 14 ang napatay kag 176 ang nasamaran sa Vietnam matapos nag-landfall ang Super Typhoon Yagi ukon kilala anay nga si Bagyo Enteng sang yari pa sa Pilipinas.
Masobra 3 million ka mga residente ang nawad-an sang suplay sang kuryente sa northern Vietnam samtang masobra naman sa 116,100 hectares sang mga prutasan kag humayan ang nahalitan.
Magluwas pa ini sa ginatos ka flights nga ginkanselar bangud sa temporaryo nga pagsirado sang apat ka airports.
Nahibaluan nga nag-landfall ang bagyo sa northern coastal provinces sang Quang Ninh kag Haiphong dala ang kabaskugon sang hangin nga 149 kilometers per hour (92 miles per hour) sang Sabado sang hapon antes naghinay sa tropical depression sang Domingo sang aga.
Antes sa Vietnam, nag-agi man ang bagyo sa isla sang Hainan nga isa ka popular tourist destination sa China kun sa diin 400,000 ka mga tawo ang nagbakwit kag tatlo ang na-rekord nga patay.
Naglaslas man ini sa Pilipinas kun sa diin sa latest record sang National Disaster Risk Reduction and Management Council (NDRRMC), 20 na ang ginbilin nga patay kag 26 pa ang missing.
