15 ka adlaw nga pagpatinir sa evacuation center, gintugot sang Iloilo City Government para sa mga residente nga nasunugan sa Rizal Pala-Pala II

ILOILO CITY – Gintugutan sang Iloilo City Government ang mga nasunugan nga residente sang Rizal Pala-Pala II, Iloilo City Proper nga temporaryo nga magtinir sa Rizal Elementary School, multi-purpose building kag Day Care Center.

Ini matapos nga 63 ka mga balay ang gintupok gid sang kalayo samtang 20 naman ang nakaangkon sang partial nga halit.

Sa interview sang Bombo Radyo kay Teresa Gelogo, pinuno sang City Social Welfare and Development Office, iya ginpahayag nga hatagan sang 15 ka adlaw ang mga residente nga wala pa sang ikasarang nga magpatukod sang puluy-an nga temporaryo nga magtinir sa evacuation center.

Suno kay Gelogo, makabaton sang P10,000 ang pamilya nga totally burned ang panimalay, samtang P7,000 ang partially burned nga panimalay.

Samtang, nagahingyo naman ang opisina sa publiko nga maghatag sang dugang nga kinahanglanon sang mga nasunugan kaangay sang kitchen utensils, mga panapton kag hiligdaan.