Naglab-ot sa ginabulubanta nga ₱9.3 milyon ang danyos sang sunog nga naglamon sa 15 ka estruktura sa Poblacion Zone II, Estancia, Iloilo, nga nagsugod ala-1 sang kaagahon, Oktubre 24.
Sa interview sang Bombo Radyo kay FO1 Louie Dionido, iya ginpahayag nga nagdangat sa third alarm ang sunog, nga nagkinahanglan sang pagresponde sang siyam ka fire station.
Bangud sa kadakuon sang kalayo, nagpatigayon man sang pagresponde ang mga bombero halin sa mga malapit nga banwa sang Sara, Batad, Balasan, Carles, San Dionisio, Concepcion, Ajuy kag Lemery agud buligan ang pagpalong sang sunog.
Lakip sa mga estruktura nga nasunog ang grocery store, tubigan, repair shop, poultry store kag iban pa nga nagkalain lain nga establishmento.
Suno kay Dionido, wala man sang nairekord nga napilasan sa insidente.
Padayon naman ang imbestigasyon sang Bureau of Fire Protection (BFP) Estancia agud mahibaluan ang ginhalinan sang sunog.
Text by: Bombo Jay Panizales
