GUIMBAL, ILOILO – Gina-monitor na sang Guimbal Municipal Health Office ang mga naka close contact sang ika-tatlo nga pasyente nga nagpositibo sa Coronavirus Disease 2019.
Ang pasyente ang naga edad sang 58 anyos nga lalaki kag nagtaliwan sang Marso 31, 2020.
Sa interview sang Bombo Radyo kay Dr. Jay Dorin, Municipal Health Officer sang banwa, iya ginpahayag nga 15 ka mga persona na ang na monitor nga naka close contact sang ika-3 nga pasyente lakip na diri ang iya nga anak, tiayon, bayaw, kabulig kag iban pa.
Suno kay Dorin, may yara sang travel history sa Metro Manila ang lalaki sang Marso 10 kag nagbalik ini sa Guimbal sang Marso 13.
Ginapahayag nga aktibo man ang lalaki sa simbahan kag gina verify pa sang Municipal Health Office kun posible nga nalatnan ang pasyente sang na-una nga kaso nga nagpositibo sa COVID-19 sa Guimbal nga isa ka lay minister nga lalaki, naga edad sang 65 anyos.
Pahayag ni Dorin, nakatawag pa ang 58 anyos nga pasyente sa iya doktor kag ginsugid sini ang iya ginabatyag apang sa sulod sang isa ka semana nga inom niya sang bulong, mas naglala pa ang iya nga sitwasyon.
