Nagapati ang anay presidente sang Integrated Bar of the Philippines (IBP) nga si Domingo Cayosa nga posible magpasaka sang panumbungon ang mga senador batuk kay anay President Rodrigo Duterte, kasunod sang iya mga pahayag nga patyon ang 15 ka mga current senators agud nga makasulod ang senatorial bets sang Partido Demokratiko Pilipino-Lakas ng Bayan.
Suno kay Cayosa, apisar nga nagaguwa nga joke lang ini sang anay presidente, mahimo nga magpasaka sang kaso ang sin-o man nga senador nga personal nga nagakabalaka ukon nahadlok sa pahayag sang anay presidente.
Kinahanglan lang suno sa iya nga magtestigo kag kabigon ang pahayag sang presidente bilang pamahog sa ila kaugalingon ukon sa ila kaluwasan.
Ginpanindugan ni Cayosa nga isa ini ka public crime kag mahimo nga mapasakaan sang kaso sa korte.
Apang suno sa iya, kun wala sang senador nga magtestigo batok sa epekto sang mga pahayag ni Duterte, mahimo nga mabudlayan ang pagpasaka sang kaso kaangay sang grave threat, bisan pa nga ang National Bureau of Investigation ang nagapatigayon sang kaugalingon nga imbestigasyon.
Suno sa anay presidente sang IBP, basehan sa gihapon sang korte ang ila desisyon kun ano man nga ebidensya ang makuha kag mapresentar.
Sang nagligad nga semana suno kay anay Pres. Duterte sa PDP-Laban proclamation rally, patyon lang sini ang mga senador para makahimo sang bakante sa senado.
Kon mahimo nga mapatay ang 15 ka senador suno sa iya, makasulod ang tanan nga kandidato sa pagkasenador sang PDP. Apisar suno sa iya nga mangin masubo kun matabo ini, madamo suno sa iya ang makaulugot sa Senado.
Bisan nagkadlaw ang mga sumalakdag sang PDP-Laban nga kabahin sang rally, ginpahayag ni Atty. Cayosa nga indi ‘excuse’ ang paglaragway sini nga isa lang ka joke, kundi, dapat man lantawon ang iban pa nga mga hitabo nga may kaangtanan sa pahayag.
