Nagpirma sang resolution ang 15 ka mga senador sa ginaduso nga resolusyon nga nagakondena sang mga pahayag sang embahada sang China batok sa pila ka mga opisyal sang gobyerno sang Pilipinas.
Ang mga statement nga ginbuy-an sang China amo ang ila balos sa kritisismo nga ginhimo sang mga Filipino officials sa mga agresibo nga aktwasyon sang Beijing sa West Philippine Sea.
Ang nagpirma sang draft resolution amo ang mga masunod: Senate President Vicente Sotto III, Panfilo Lacson, Juan Miguel Zubiri, Francis Pangilinan, Risa Hontiveros, Erwin Tulfo, Raffy Tulfo, Sherwin Gatchalian, Loren Legarda, JV Ejercito, Jinggoy Estrada, Bam Aquino, Lito Lapid, Camille Villar, kag Mark Villar.
Nagpanawagan man ang mga senador sa Department of Foreign Affairs (DFA) nga maghulag na kag maghimo sang diplomatiko nga mga tikang agud nga mapangapinan ang dignidad sang Pilipinas.
Una na nga nagpasaka sang diplomatic protests ang China batok kay Philippine Coast Guard (PCG) spokesperson for the West Philippine Sea Commodore Jay Tarriela bangud sa social media posts sini batok sa Chinese leaders.
Naka-post anay si Tarriela sang laragway ni Chinese President Xi Jinping nga may banner nga “Why China remains to be bully?”
Nagpanindugan naman si Tarriela nga nakabase ang iya mga pahayag sa matuod nga mga hitabo.
Gilayon man nga nagpaguwa sang statement ang Malacanang nga nagatindog ini kaupod sa Filipino government officials nga gina-atake sang China bangud sang ila pagpamatok sa mga sala-sala nga naratibo sa West Philippine Sea.
Una naman nga nagkondena ang Department of National Defense kag ang National Security Council sa mga pahayag sang China.
