ILOILO CITY – Wala sang may nakapyansa sa 154 ka mga nagkaladakpan nga nagapauwak sa Brgy. Balabag, Dumangas, Iloilo.
Ini matapos nga pormal na sila nga ginpasakaan sang kaso sa Ramon Avanceña Hall of Justice nga paglapas sa Presidential Decree 1602 ukon may kaangtanan sa illegal gambling.
Sa interview sang Bombo Radyo sa isa sa mga nagdakpan nga nagpahinago lang sang pangalan, iya ginpahayag nga antes siya nagpauli, naghapit siya agud nga maglantaw sang pauwak.
Suno sa arestado, sang natigayon ang raid, wala siya nagpalagyo bangud nga wala man siya sang may ginhimo nga malain kag nagpasalig ang promoter nga may permit ang nasambit nga aktibidad.
Ginpahayag sang arestado nga kun tani, buligan sila sang promoter agud nga indi sila mapreso ilabi na sa iya bahin nga may yara pa sang may ginapa-eskwela nga kabataan.
Ginpanindugan sang natungdan nga inosente siya kag nagakabalaka sa iya madangatan sa presuhan ilabi na nga holiday buwas nga adlaw.
