Natughong na sang 157 ka mga tricycle driver gikan sa nagkalain-lain nga toda sa distrito sang La Paz ang ila nga P500 fuel subsidy subong nga adlaw, Marso 28.
Sa interview sang Bombo Radyo kay Jomarie Bendaval, isa ka tricycle driver nga may ruta nga Javellana-San Pedro-Ledesco Village, iya ginpahayag nga daku ang bulig sang P500 nga fuel subsidy bangud nga makalibre ini sila sang gatong sa pila ka adlaw nga byahe.
Suno kay Bendaval, nagalab-ot pa sa isa ka semana sang una ang P500 pesos nga gatong apang subong asta na lang ini sa tatlo ka adlaw.
Pahayag niya, agud nga mas makatipid sila sa gatong wala na sila nagalibot kag nagapila na lang sa ila toda kun sa diin maximun lang sa lima ka pasahero ang ila pwede mapasakay sa isa ka byahe.
Apang, ginpahayag pa niya nga indi sa gihapon husto ang ila kita bangud nga halos tanan sini nagakadto na lang subong sa ila pagpagatong.
Dugang pa ni Bendaval, naga-umpisa siya byahe alas-syete sa aga tubtob alas-onse sa gab-i para madugangan ang iya kita bangud nga tama na gid ka pigado ka kabuhi subong ilabi na nga halos tanan nga balaklon nagataas ang presyo.
Reported by: Bombo Krylle Crislyn Melliza
