DUEÑAS, ILOILO – Natalana nga igapaidalom sa medical examination ang 16 anyos nga dalagita nga ginapahayag biktima sang gang rape sa Brgy. Poblacion, Dueñas, Iloilo.
Sa interview sang Bombo Radyo kay Police Corporal Juwanes Amparan sang Women and Children Protection Desk sang Dueñas Municipal Police Station, iya ginpahayag nga ang biktima ang ginkilala nga si alyas Den-den sang Passi City samtang ang lima naman ka mga minor de edad nga suspek ang naga-edad sang 15 tubtub 17 anyos.
Suno kay Amparan, ginhagad ang biktima sang duha niya ka classmate nga mag-inom kaupod ang mga suspek nga lunsay tumandok sang Dueñas, Iloilo.
Ginpahayag ni Amparan nga wala sang kaiping ang balay kun sa diin nagpahubog ang mga minor de edad.
Santo sa panaysayon sang biktima suno kay Amparan, indi personal nga kilala sang biktima ang mga suspek.
Nauna nga nagpahuway sa sulod sang isa ka hulot ang biktima apang sa iya nga pagbugtaw, didto na niya natukiban ang pagpanghimulos sa iya.
Sa subong suno kay Amparan, ang isa sa mga suspek ang nagsungka kag yara na sa pag-inakop sang Department of Social Welfare and Development samtang nakilala naman ang apat ka iban pa nga minor de edad nga naghimulos sa biktima.
Santo naman sa mga ginikanan, wala pa nakapauli sa ila balay ang aapat ka mga minor de edad.
