ILOILO CITY–Gingulgol-patay ang 16-anyos nga babayi sa sulod sang ila balay sa Zacarias Subdivision, Cabatuan, Iloilo.
Sa interview sang Bombo Radyo kay Marilou Mayormente, iloy sang biktima nga si Ariza, iya ginpahayag nga nga nagaka-angkon sang pilas sa liog, ulo kag sa kilid sang lawas ang biktima.
Kahapon nga adlaw suno kay Marilou, naghapit sa ila nga baligyaan sa Cabatuan Public Market si Ariza agud nga magbulig sa pagbaligya sang mga frozen food.
Alas 9:30 sang gab-i, gindul-ong sang iya nga bana nga si Ariston si Ariza sa ila nga balay agud nga makapahuway.
Gilayon nga nagbalik si Ariston sa merkado agud siya ang sugaton.
Alas 10:30 sang gab-i, nagpauli ang mag-asawa sa ila nga balay kag nakit-an lamang sang iloy nga bukas na ang pwertahan sa likod nga bahin sang ila nga balay.
Wala niya ini ginhatagan sang igtalupangod kag nagderetso na lang sa ila kwarto agud nga magtulog sa diin naka separar man ang kwarto sang ila nga anak.
Alas 6:00 kaina sang aga, natingala ang iloy nga wala pa nakabugtaw ang iya nga anak agud nga mag-eskwela.
Ginsulod sang iloy sa kwarto si Ariza kag nakibot na lamang nga ang iya anak ang yara na sa salog, nagakaya kag duguon.
Suno sa iloy, mala na ang dugo sang iya nga anak kag ginapatihan nga mahimo sang gab-i pa natabo ang krimen.
Ginahibalo pa sanga otoridad kun sin-o ang suspek sa pagpatay sa biktima.
