ILOILO CITY – Naghibi kag nagpalangurog ang 16 anyos nga dalagita matapos nga ginliko sang isa ka taxi driver sa isa ka drive-in hotel sa Brgy. Bolilao, Mandurriao, Iloilo City.
Sa interview sang Bombo Radyo kay Barangay Tanod Fernando Pardurla sang nasambit nga lugar, iya ginpahayag nga halin sa isa ka mall ang dalagita kag nagpadul-ong sa Brgy. Sambag sang hinali lang nga ginliko sang taxi driver sa Queens Court drive-in hotel.
Suno kay Pardurla, nakibot ang dalagita sang nag-agi na sa Jalandoni Extension ang taxi kag kasubong nga lain na nga direksyon ang ila gina-usoy.
Ginpahayag ni Pardurla nga ginkulbaan ang dalagita sang naka-abot na sa nasambit nga drive-on hotel ang taxi kag sang nakakita sang kahigayunan, nakapanaog sa salakyan ang dalagita kag nakapangayo sang bulig sa security guard.
May isa ka concerned citizen suno kay Pardurla nga nagpahibalo sa ila tuhoy sa natabo sa biktima kag ila gilayon ini nga ginpa-blotter sa Mandurriao Police Station.
Wala na matalupangdan sang dalagita ang pangalan kag plaka sang taxi unit apang iya nga nakuhaan sang laragway ang body number sang salakyan.
Gilayon man nga nadakpan sang otoridad ang taxi driver nga preso sa Mandurriao Police Station.
