ILOILO CITY–Patay ang 16 anyos nga dalagita matapos ginluthang sang iya man lang nga stepfather sa Brgy. Buntalan, Maasin, Iloilo.
Sa interview sang Bombo Radyo kay Police Inspector Oswald Gatuslao, hepe sang Maasin Municipal Police Station, ang amay nga si Jerol Guillermo ang gilayon nga nagpalagyo sakay sa iya tricycle matapos ang pagluthang-patay sa biktima nga si Alleja Faye Malificiar.
Ang tricycle ang ginbilin sang suspetsado sa likod sang Maasin Covered Gym kag nagsakay sa motorsiklo kag nagpalagyo sa wala mahibalu-an nga direksyon.
Ginkumpirma naman ni Security Guard Herminio Rioboca sang Ramon Tabiana District Hospital sa Cabatuan, Iloilo nga dead on arrival sa ospital ang biktima.
Ang 16 anyos nga dalagita ang nakaangkon sang pilas sa ulo,  dughan kag kamot tuga sang 45 caliber pistol.
Santo sa pagpangusisa, cellphone ang gin-awayan sang duha.
Samtang, nagahilibi-on nga ginsaysay sang mga abyan kun ano nga sahi sang tawo ang stepfather nga nagluthang-patay sa iya manak.
Sa interview sang Bombo Radyo sa abyan ni Allejah Faye Malificiar, iya ginpahayag nga masami nga nagapangimon ang suspetsado nga si Jerold Guillermo kun masami nga may ka-chat sa social media ang iya manak.
Ginpahayag dugang sang abyan nga luyag ni Guillermo nga mahibalu-an ang password sang cellphone kag social media account sang iya biktima.
Nakasugid man sadto ang ila abyan nga ginapilit ni Guillermo nga kuhaon ang cellphone sang biktima.
Magluwas diri, ginasakit man ang biktima sang iya nga stepfather.
Ginpahayag man sang abyan nga indi maluyag ang suspetsado nga may yara sang magpalapit nga lalaki 16 anyos nga dalagita.
Ang mga nasambit nga rason suno sa abyan ang nagtulod sa biktima sadto nga mag-inom sang madamu nga pills agud kuntani nga maghikog.