ILOILO CITY- 16 ka mga barangay sa Syudad sang Iloilo nga nalakip sa listahan sang communist-terrorist group-threatened barangays ang makabaton sang tag P1.5M nga balor sang proyekto gikan sa gobyerno.
Ini ang ginalakipan sang Bito-on, Sambag, Democracia kag Tabuc Suba sa Jaro; Bonifacio,Sooc kag Sto. Niño Sur sa Arevalo; Calahunan, Dungon C, kag Navais, sa Mandurriao; North Baluarte kag San Pedro sa Molo; Progreso kag Punong sa Lapuz; President Roxas sa City Proper; kag Rizal sa Lapaz.
Sa interview sang Bombo Radyo kay Oscar Lim, director sang Department of the Interior and Local Government (DILG) Iloilo City, iya ginpahayag nga mismo ang Barangay Development Council ang nagaplano kon nga mga proyekto ang gamitan sang amo nga pondo.
Suno kay Lim, ang katungdanan lang nila sa DILG amo nga iconsolidate ini kag ipasa sa Central Office.
Una na nga gindeklarar nga cleared gikan sa presensya sang communist terrorist groups ang Brgy. Dungon A, Dungon B, kag Tacas sa Jaro, Lapuz Norte kag Sinikway sa Lapuz, kag Ingore sa Lapaz sa diin tag P20M nga balor sang proyekto ang ila nabaton.
