Patay ang 16 ka mga estudyante matapos nga nag-collapse ang ila eskwelahan sa central Nigeria.
Ginapahayag nga nagakuha gid sang exam ang mga estudyante sa Saint Academy school sa Jos North district sa Plateau State sang natabo ang amo nga insidente.
Naghatag man sang statement ang National Emergency Management Agency nga nagakumpirma nga nag-collapse ang duha ka panalgan nga building kun sa diin nahamtang ang Saint Academy kag na-trap ang pila sa mga estudyante.
Nagapadayon pa ang ginapatigayon sang otoridad nga search and rescue operation.
Sandig sa inisyal nga impormasyon, 11 na sa mga lawas ang yara sa morgue sa Bingham University Teaching Hospital kag lima naman ang gindala sa mortuary sang Our Lady of Apostles Hospital sa Jos.
Suno naman sa ospital, 15 ang na-rescue nga mga kabataan kag subong ginadapatan na sang pagbulong.
Wala pa sang madamo nga detalye nga nahatag kun ano ang rason sang pag-collapse apang ginpahayag nga tatlo ka adlaw na nga mamunog ang pag-ulan sa Plateau.
Nahibaluan nga masami nagakatabo ang kaangay nga trahedya sa mga building sa Nigeria bangud sa pigado nga law enforcement sa construction standards, negligence kag low-quality materials.
