BAROTAC VIEJO, ILOILO – 16 ang nadakpan lakip na diri ang isa ka Punong Barangay matapos naaktuhan nga nagapatigayon sang illegal gambling operation sa Brgy. Bugnay, Barotac Viejo, Iloilo.
Sa interview sang Bombo Radyo kay Police Captain Kenn Albert Lepsia, hepe sang Barotac Viejo Municipal Police Station, iya ginpahayag nga ang mga nagkaladakpan ang naaktuhan nga nagahampang sang billiards kun sa diin nakuha ang P20,000 nga bet money.
Suno kay Lepsia, ang illegal gambling ang natabo mismo sa balay ni Punong Barangay Regie Mayoho apang nagapanindugan ang opisyal nga ang utiod niya amo ang matuod nga tag-iya.
Ginpahayag ni Lepsia nga sa ginpatigayon nga Anti-illegal gambling operation, nakapalagyo ang utod sang Punong Barangay.
Legal ang edad sang 16 ka mga nagkaladakpan nga residente sang Brgy. Bugnay kag kaiping nga mga lugar kun sa diin isa ang senior citizen.
Buwas nga adlaw, Setyembre 4, natalana nga ipasaka ang nagakaigo nga kaso paagi sa inquest samtang preliminary investigation naman para sa utod sang Punong Barangay nga nakapalagyo.
Magluwas diri, mahimo man nga kasuhan ang mga arestado bangud sa paglapas sa ginapatuman nga minimum health standards.
