ILOILO CITY- Nagahulat sa gihapon ang 16 ka mga barangay sa Syudad sang Iloilo nga mahatagan sang cash aid sa idalom sang Assistance for Individuals in Crisis Situation (AICS) sang Department of Social Welfare and Development Office (DSWD).
Ini ang ginalakipan sang Brgy. Bantud,Banuyao,Magdalo,kag Railway sa La Paz; Brgy. Taft North kag Navais sa Mandurriao; Brgy. Democracia, Ma. Cristina, Balantang, Our Lady of Lourdes, Cubay, El 98, Libertad- Sta. Isabel, Seminario kag Ungka I sa Jaro; kag General Hughes sa City Proper.
Sa interview sang Bombo Radyo kay Teresa Gelogo, head sang City Social Welfare and Development Office (CSWDO) iya ginpahayag nga ini nga mga barangay ang wala pa gid mahatagan sang bisan una nga batch lang sang ayuda.
Suno kay Gelogo, ini bangod nga wala nagasanto ang lista nga ginapasa sang barangay sa crossmatching sang CSWDO.
Nagpasalig naman ini nga mahatag na ang ayuda antes ang August 26 nga extension nga ginhatag sang DSWD.
