LEON, ILOILO — Naglab-ot sa 16 ka mga indibidwal ang pilason matapos nga nga nahulog ang van nga ila ginasakyan sa pil-as sang Barangay Mali-ao, Leon, Iloilo.
Sa interview sang Bombo Radyo kay Police Captain John Predic Padilla, hepe sang Leon Municipal Police Station, iya ginpahayag nga gindala ang apat ka mga biktima sa syudad sang Iloilo bangud yara ini sa kritikal nga kondisyon kag agud malapatan sang nakaigo nga pagbulong.
Suno kay Padilla, lunsay mga pharmacist ang mga biktima, sa diin, nagpakibahin pa ini sa team building sa Bucari, Leon, Iloilo antes natabo ang insidente.
Ginpahayag man ni Padilla nga nadulaan sang preno ang van rason nga nagderetso ini sa isa ka pil-as kag nahulog.
Gindala naman ang 12 ka mga biktima sa Aleosan District Hospital matapos nga ma-rescue sang Iloilo Emergency Response Teams kag mga Municipal Disaster Risk Reduction and Management Offices (MDRRMO) sang Sta. Barbara, Alimodian, San Miguel, Tigbauan kag Pavia.
Nahibaluan nga ang dalan nga gin-agyan sang van amo ang dulhogon kag isa ka S-Road.
