ILOILO CITY – Naglab-ot na sa 381 ang kabug-usan nga numero sang Coronavirus Disease 2019 (COVID-19) sa Western Visayas matapos nga 16 ka panibag-o nga kaso ang nagdugang.
As of July 4, 296 ang nagnegatibo gikan sa 313 ka laboratory results apang ang isa ka positive case ang indi counted sa Western Visayas.
Magluwas sa pagsaka sang kumpirmado nga kaso, nagsaka man sa 150 ang mga naka-recover samtang nagapabilin sa 11 ang ginbawi-an sang kabuhi.
Sa 16 ka mga pasyente nga nagdugang sa Rehiyon 6, isa ang admitted sa hospital, 14 ang naka-facility quarantine kag isa ang naka-home quarantine.
Ang isa ka kumpirmado nga kaso nga counted sa kategorya nga “Tagged to other Region” ang naka-facility quarantine.
Ang duha naman ka mga pasyente nga naka-recover amo sanday:
Patient no. 149 – 32 anyos nga lalaki sang La Paz, Iloilo City
Patient no. 150 – 50 anyos nga lalaki sang Mandurriao, Iloilo City
Kun pahat-pahaton, ang Aklan ang may 6 ka COVID-19 cases, Antique ang may 15, Capiz ang may 6, Iloilo Province ang may 40, Negros Occidental ang may 5, Bacolod City ang may 11, Iloilo City ang may 35 kag 263 sa mga repatriates.
May kaangtanan diri, ginpahayag naman ni Mayor Jerry Treñas nga apat sa 16 ka panibag-o nga kaso ang na record sa syudad sang Iloilo.
Santo sa initial information nga nabaton ni Treñas, ang mga nagpositibo ang ginalakipan sang sa isa ka doktor kag isa ka housekeeping personnel sang St. Paul’s Hospital of Iloilo, isa ka personnel sang City Health Office kag isa ka personnel sang Public Safety and Transportation Management Office.
Ang personnel sang City Health Office amo ang tiayon sang driver sang Public Safety and Transportation Management Office nga una nga nagpositibo sa COVID-19.
Ang ginakahangaw-an lang sang alkalde amo nga mahimo pa nga madugangan ang mga nagpositibo paagi sa local transmission bangud nga madamo ang Locally Stranded Individual kag repatriated Overseas Filipino Workers nga nagpauli.
