Ginreklamo sang pamilya sang isa sa mga menor-de-edad nga ginapahayag gin-bully kag ginsakit sang kaupdanan sini sa Balay Dalayunan sang Iloilo City Government.
Sa interview sang Bombo Radyo kay Alyas Nene, tiya sang biktima, iya ginpahayag nga masami ginasakit ang iya hinablos sang mga kaupdanan sini nga menor-de-edad man.
Suno kay Nene, kahapon nga adlaw, naglab-ot gid sa pagpangbuno sang toothbrush ang pagpanakit nga ginhimo sang mga kaupdanan sang iya hinablos sa Balay Dalayunan.
Ginpahayag man sini nga ginpilit man nga papilion ang iya hinablos kon luyag sini nga sakiton ukon makipag-oral sex.
Ginpili naman sang biktima nga sakiton na lang siya rason nga nag-agum ini sang pagkabuno sang toothbrush sa nagkalain-lain nga parte sang iya lawas.
Naghingyo man ang natungdan nga kontani mas mapasangkad sang city government ang ila seguridad sa amo nga shelter facility agud nga indi na masulit ang insidente.
Nagpakig-angot naman ang Iloilo City Government sa head sang Balay Dalayunan sa Barrio Obrero, Lapuz, Iloilo City agud i-verify ang natabo nga ginapahayag pagpanakit sa mga menor-de-edad nga nakahamtang sa shelter facility.
Suno kay Joy Fantilaga, spokesperson ni Iloilo City Mayor Jerry Treñas, iya ginpahayag nga ginkumpirma sang facility nga may natabo nga pagpanakit kag pagpang-bully sa isa sa mga menor-de-edad.
Gilayon man nga ginpatawag sang city government ang tiya sang biktima agud nga istoryahon kag hatagan sang solusyon ang insidente.
Gintuman naman sang Iloilo City Social Welfare and Development Office ang hingyo sang tiya sang biktima nga iseparar ang 17-anyos nga hinablos sini agud nga indi na masakit kag ma-bully.
Nahibaluan nga may 21 ka mga menor-de-edad ukon Child in conflict with the law ukon “CICL” ang nakahamtang sa Balay Dalyunan sang Iloilo City Government.
Butangan naman sang security guard, closed circuit television (CCTV), kag psychological expert ang talatapan agud nga indi na masulit pa ang natabo.
