𝗜𝗟𝗢𝗜𝗟𝗢 𝗖𝗜𝗧𝗬 – Mas hugtan pa ang ipatuman nga seguridad sa Dalayunan: A Home for Boys sa Zone 2 Barrio Obrero, Lapuz, Iloilo City.
Ini ang kasunod man sang reklamo nga may 17 anyos nga “Child in conflict with the law” nga gina-bully sang lima ka mga menor de edad nga mga kaupod sini sa shelter.
Santo sa record sang Women and Children Protection Desk sang Iloilo City Police Station 9, nagwa nga ginpaso sang sigarilyo, ginbuno sang ballpen sa butkon kag ginkastigo ang menor de edad.
Sa interview sang Bombo Radyo kay Ms. Grace Centino, Division Head sang Child and Youth Welfare Program sa Balay Dalayunan, iya ginpahayag nga nagpatigayon na sila sang validation kasunod sang reklamo.
Suno kay Centino, ginkuha man nila ang history sang menor de edad sa diin natukiban nga may yara ini sang depression.
Sa subong, nagapabilin naman nga naka-isolate ang biktima.
