Patay ang 17-anyos nga Chinese badminton player matapos nga nag-collapse sa court kadungan sang international tournament sa Indonesia.
Ang biktima amo si Zhang Zhijie nga kabahin sang national youth team sang China halin sang nagligad nga tuig.
Natabo ang insidente kadungan sang sambuwa sini sang Domingo, Hunyo 30, batok kay Kazuma Kawano sang Japan sa Asia Junior Championships sa Yogyakarta.
Yara na sa 11-11 ang skor sa una nga game sang hinali lang nga natumba si Zhang. Gilayon ini nga gindapatan sang treatment sa venue kag gindalagan man sa ospital apang ginbawian gid sang kabuhi.
Indi pa maathag kun ano gid ang nangin rason sang iya kamatayon.
“China’s Zhang Zhijie, a singles player, collapsed on the court during a match in the evening,” kabahin sang joint statement sang Badminton Asia kag Badminton Association of Indonesia (PBSI).
“He was sent to the hospital where he passed away at 23:20 local time yesterday. He was attended to by the tournament doctor and medical team. He was taken in the standby ambulance in less than two minutes and sent to hospital.”
“The world of badminton has lost a talented player,” dugang pa sa statement.
Nahibaluan nga nagahampang na ini sang badminton halin pa sang Kindergarten, kag sini lang nga 2024, nakadaog pa ini sang singles title sa Dutch Junior International nga isa ka prestihiyoso nga youth tournament.
“Zhang Zhijie loved badminton and was an outstanding athlete of the national youth badminton team,” suno sa China’s Badminton Association. “At present the local hospital has not yet identified the cause of death.”
Ang team tournament sa city of Yogyakarta ang nagpatigayon man sang moment’s silence sang Lunes kag nagsuksok naman ang Chinese team sang itom nga armbands bilang marka sang ila respeto sa ila kaupod nga napatay.
